Toni Lauerer

 

Kalorien

Ogfangt hod des Ganze im Wartezimmer vom Zahnarzt. Do sitzt drin, nervös bist, da Zahn dout da wej,
grantig bist und drokemma doust net. Wos sollst mocha? Bladlst holt a weng in de Zeitschriftn umanand.
De liegnd in dem Wartezimmer stoußweis am Tisch. I nimm aso a Zeitschrift, und wos dawische? A
Broschüre iwa d'Gsundheit. Und wos i do drin glesn hob, des hod mir überhaupt net gfolln. Do is nämlich
dringstandn, daß Übergwicht ungsund is. Greisliche Sachern san do dringstandn.

10 %   über Normal   =   Müdigkeit

20 %   über Normal   =   beginnende Unförmigkeit

30 %   über Normal   =   Atemnot

40 %   über Normal   =   ausgeprägte Unförmigkeit, Gefahr der Impotenz (!)

50 %   über Normal   =   alle Körperfunktionen beeinträchtigt

no wamperter            =    praktisch nicht lebensfähig

Mei Liawa, do bin i ganz schej daschrocka.
Net, daß i mi als wampert bezeichnen daad, owa dohoam hob i mi glei gwogn. Na bine no mehr daschrocka:
34 % iwa normal - des is genau da Durchschnitt zwischen Atemnot und Impotenz! Da mochstda deine Ge-
danken, des kon i eich sogn.
Bis ejtz hob i o eigentlich alles ganz guat daschnauft, wirklich alles. Owa wos net is, des kon no kemma. Do
gibts bloß oans: onehma, und des sofort!
Und wej gejt's Onehma?
's Übel mouma vo da Wurz packa! Und wer is's Übel? D'Kalorien sans, de elendign Kalorien!
"Ab sofort", hob i zu mir sölba gsagt, "ab sofort werdns zöhlt, de Kalorien! A jeds Kalorierl, aa wenns no
so kloa is, wird ab sofort zöhlt".
Aso a kloana Bauch, wej i oan hob, der besteht o aus Tausenden vo Kalorien, de wos im Prinzip iwahaupt
net braucht.
Daß des Ganze an Sinn hod, hobma i am naxtn Dog an Kalorienfahrplan kafft. Der hod 16 Mark kost, owa
der schaut echt guat aus. Der is sogor farbig. Und wos wüllst mocha, d'Gsundheit is holt net büllig.
Drinstej dout in dem Kalorienfahrplan alles, alphabetisch, vo "Aal geräuchert" bis "Zuckerwatte" oder "Zefix,
wieder z'vül gfressn!"
Des Guade an dem Fahrplan is, du konnst net bloß lesn, wos du'n ganzn Dog einefrißt, sondern aa, wos du
durch Sport und anderne gfährliche Sachern wieder aussahaust.
Zum Beispül letztn Donnerstag:
Do hamma aaf d'Nacht Kortn gspült. Bis um zwölfe hob i sechs Weißbier ghod. Also: Pro Holbe zwoa
Stund spazierngej, des san 12 Stund. Hejt i also bis Freitag mittog um zwölfe spazierngej mejßn. Owa erstns
bin i saumejd gwen, zwoatns mou i um achte's Orwatn ofanga und drittns, wej schaut des aus, wenn i zwölf
Stund in da Stod umanandarenn.
Spazierngej is praktisch net immer's Ideale.
Owa es gibt tausend Möglichkeiten. De stengand alle in mein Fahrplan drin. A ganz a interessante is zum
Beispül da Ehestreit. A Ehestreit bringt -70 Kalorien. A heftiger Ehestreit sogor -100 Kalorien. Also wennma
ganz normal ißt und dauernd streit, dann nimmtma o!
Ideal is o a Lungenentzündung. A Lungenentzündung, de wej guat ausgreift is, de bringt -2500 Kalorien.
No besser is Migräne, wal des dauert jahrelang. Des gibt richtig aus. A Stund Kopfschmerz bringt -100 Kalorien,
a Stund rasender Kopfschmerz -150 Kalorien. Do rasnd d'Kalorien glei mit weg. Den Fahrplan wennsda
dauernd oschaust, der gejt dir fei dodal in Fleisch und Bluat iwa.
Bloß a Beispül: Mir samma vorgestern noch da Orwat no ins Wirtshaus ganga. Duat hob i dann drei Holbe
Bier trunka (+900), an sauern Pressog gessn (+400) und a Scheibn Brout (+80).
Des is fei ejtza koa Schmarrn, wos i do schreib. Des denkama wirklich beim Essn und beim Trinka, wos des
an Kalorien bringt, wal anderst host keine Chance. Also, wej gsagt, a Scheibn Brout (+80).
Dann bine kurz aafs Klo (-300), eigentlich hejts mehr sa kina, owa i hob koa Zeit ghod.
Um holbe zehne bine hoam, natürlich z'Fouß (-80), und ziddert hob i wej da Deifl (-100), wal i zum Wei
gsagt hob, um achte bine spätestens dahoam. Wej i dahoam in d'Stubn eine bin, is mei Abendessen (+600)
eiskolt am Tisch gstana. Genau so eiskolt hod mi mei Frau ogschaut, daße glei no mehr ziddert hob (-150).
A mittlerer Ehestreit (-95) hodse net vermeidn loussn, wortlos bine zu Fuß (-3) ins Bett und hob vor lauter
Zorn no an Kirsch (+200) trunka.
Im Bett hodse dann zwischn mein Wej und mir nix mehr ogspült, obwohl des, aso wej i mi kenn, mindestens
-5000 brocht hejd.
Owa dafür hob i de ganze Nacht vor lauter Kopfwej (-500) net schloffa kina. Is also da Dog kalorienmäßig
guat ausganga. Insgesamt bin i o recht zuversichtlich, daß i mit mein Fahrplan aaf absehbare Zeit wieder a
Badhosnfigur hob.
Vielleicht krejg i no a Lungenentzündung, kombiniert mit Migräne und Ehestreit. Dann gangs schnöller mitn Ohnehma.

Drucktsma d'Daam!